ERG мен Eurasian Machinery Қашар кенішінде троллейвоз жобасын сынақтан өткізеді

Eurasian Machinery, «Қашары Руда» және ERG Коммерциялық орталығы Hitachi брендінің шамамен 221 тонна жүк көтергіштігі бар карьерлік самосвалы негізінде троллейвоз технологиясын — электр қуатымен жұмыс істейтін рельссіз көлікті — сынақтан өткізу туралы меморандумға қол қойды.

Бұл технология алып жүк көліктерінің карьердің белгілі бір учаскелерінде электр сымдарына қосылуына мүмкіндік беріп, дизель отынына тәуелділікті азайтады. Ұқсас жүйелерді Hitachi бұған дейін шетелде, соның ішінде Замбияның ірі кеніштерінің бірінде сынақтан өткізген. Онда отын шығыны 90 пайызға дейін қысқарып, қозғалтқыштардың қызмет ету мерзімі ұзарып, техниканың бос тұрып қалу жағдайы азайған.

Eurasian Machinery бас атқарушы директоры Мехмет Кемаль Четинелли жобаның ERG үшін тиімділігін атап өтті: компания электр энергиясын өзі өндіретіндіктен, отын бағасының тұрақсыздығына тәуелділік азаяды. Оның айтуынша, троллейвоз технологиясы жұмыс істегенде жүк тиелген самосвалдың жылдамдығы қалыпты жағдаймен салыстырғанда 2,5 есе артады, бұл өндіріс көлемін де ұлғайтуға мүмкіндік береді.

ERG Коммерциялық орталығы бас директорының орынбасары Евгений Тенеков компанияның Hitachi және Eurasian Machinery-мен серіктестігі 2007 жылдан бері жалғасып келе жатқанын жеткізді. Қазіргі таңда топ құрамында Eurasian Machinery-дің 140-тан астам техникасы бар, ал оған қызмет көрсетуге компанияның шамамен 300 маманы жауап береді.

Сынақ алаңы ретінде негізгі техника паркі шоғырланған Қашар кеніші таңдалды — мұнда болашақта дизельден электр қуатына көшірілуі мүмкін 47 жапондық самосвал бар. Алғашқы кезеңде-ақ отын үнемдеу 20 пайыздан асады деп болжануда, сонымен қатар карьердегі шу деңгейі мен зиянды шығарындылар да азаяды.

Жобаны дайындауға бір жылдан астам уақыт қажет болады, оның ішінде карьерде арнайы инфрақұрылым құрылады. Тараптар сынақ нәтижелерін келесі жылдың соңына қарай бағалап, технологияны ауқымды түрде енгізу туралы шешім қабылдайды.